עוּרִי עוּרִי לִבְשִׁי עֹז זְרוֹעַ יְהוָה עוּרִי כִּימֵי קֶדֶם דֹּרוֹת עוֹלָמִים הֲלוֹא אַתְּ הִיא הַמַּחְצֶבֶת רַהַב מְחוֹלֶלֶת תַּנִּין׃ 

מזמורים הסטוריים - קורות ישראל מתוך תהלות

מזמור עח

א  הַאֲזִינָה עַמִּי תּוֹרָתִי הַטּוּ אָזְנְכֶם לְאִמְרֵי פִי׃
ב  אֶפְתְּחָה בְמָשָׁל פִּי אַבִּיעָה חִידוֹת מִנִּי קֶדֶם׃
ג   אֲשֶׁר שָׁמַעְנוּ וַנֵּדָעֵם וַאֲבוֹתֵינוּ סִפְּרוּ לָנוּ׃ 
    לֹא נִכְחָד מִבְּנֵיהֶם:
ד  לְדוֹר אַחֲרוֹן מְסַפְּרִים תְּהִלּוֹת יְהוָה וֶעֱזוּזוֹ 
    וְנִפְלְאֹתָיו אֲשֶׁר עָשָׂה׃ 
ה  וַיָּקֶם עֵדוּת בְּיַעֲקֹב וְתוֹרָה שָׂם בְּיִשְׂרָאֵל 
    אֲשֶׁר צִוָּה אֶת אֲבוֹתֵינוּ לְהוֹדִיעָם לִבְנֵיהֶם׃
ו   לְמַעַן יֵדְעוּ דּוֹר אַחֲרוֹן     
    בָּנִים יִוָּלֵדוּ יָקֻמוּ וִיסַפְּרוּ לִבְנֵיהֶם׃
ז   וְיָשִׂימוּ בְיְהוָה כִּסְלָם וְלֹא יִשְׁכְּחוּ מַעַלְלֵי אֵל 
    וּמִצְוֹתָיו יִנְצֹרוּ׃
ח  וְלֹא יִהְיוּ כַּאֲבוֹתָם דּוֹר סוֹרֵר וּמֹּרֶה    
    דּוֹר לֹא הֵכִין לִבּוֹ וְלֹא נֶאֶמְנָה אֶת אֵל רוּחוֹ׃
ט  בְּנֵי אֶפְרַיִם נוֹשְׁקֵי רוֹמִי קָשֶׁת הָפְכוּ בְּיוֹם קְרָב׃ 
י   לֹא שָׁמְרוּ בְּרִית יְהוָה וּבְתוֹרָתוֹ מֵאֲנוּ לָלֶכֶת׃
יא  וַיִּשְׁכְּחוּ עֲלִילוֹתָיו וְנִפְלְאוֹתָיו אֲשֶׁר הֶרְאָם׃
יב  נֶגֶד אֲבוֹתָם עָשָׂה פֶלֶא בְּאֶרֶץ מִצְרַיִם שְׂדֵה צֹעַן׃
יג   בָּקַע יָם וַיַּעֲבִירֵם וַיַּצֶּב מַיִם כְּמוֹ נֵד׃
יד  וַיַּנְחֵם בֶּעָנָן יוֹמָם וְכָל הַלַּיְלָה בְּאוֹר אֵשׁ׃
טו  יְבַקַּע צֻרִים בַּמִּדְבָּר וַיַּשְׁקְ כִּתְהֹמוֹת רַבָּה׃
טז  וַיּוֹצִא נוֹזְלִים מִסָּלַע וַיּוֹרֶד כַּנְּהָרוֹת מָיִם׃
יז   וַיּוֹסִיפוּ עוֹד לַחֲטֹא לוֹ לַמְּרוֹת עֶלְיוֹן בַּצִּיָּה׃
יח  וַיְנַסּוּ אֵל בִּלְבָבָם לִשְׁאָל אֹכֶל לְנַפְשָׁם׃
יט  וַיְדַבְּרוּ בֵּיְהוָה אָמְרוּ    הֲיוּכַל אֵל לַעֲרֹךְ שֻׁלְחָן בַּמִּדְבָּר׃
כ   הֵן הִכָּה צוּר וַיָּזוּבוּ מַיִם וּנְחָלִים יִשְׁטֹפוּ     

     הֲגַם לֶחֶם יוּכַל תֵּת אִם יָכִין שְׁאֵר לְעַמּוֹ׃
כא  לָכֵן שָׁמַע יְהוָה וַיִּתְעַבָּר     

      נָשְּׂקָה בְיַעֲקֹב וְגַם אַף עָלָה בְיִשְׂרָאֵל׃
כב  כִּי לֹא הֶאֱמִינוּ בֵּיְהוָה וְלֹא בָטְחוּ בִּישׁוּעָתוֹ׃
כג   וַיְצַו שְׁחָקִים מִמָּעַל וְדַלְתֵי שָׁמַיִם פָּתָח׃
כד  וַיַּמְטֵר עֲלֵיהֶם מָן לֶאֱכֹל וּדְגַן שָׁמַיִם נָתַן לָמוֹ׃
כה  לֶחֶם אַבִּירִים אָכַל אִישׁ צֵידָה שָׁלַח לָהֶם לָשֹׂבַע׃
כו   יַסַּע קדִים בַּשָּׁמָיִם וַיְנַהֵג בְּעֻזּוֹ תֵימָן׃
כז   וַיַּמְטֵר עֲלֵיהֶם כֶּעָפָר שְׁאֵר וּכְחוֹל יַמִּים עוֹף כָּנָף׃
כח  וַיַּפֵּל בְּקֶרֶב מַחֲנֵהוּ סָבִיב לְמִשְׁכְּנֹתָיו׃
כט  וַיֹּאכְלוּ וַיִּשְׂבְּעוּ מְאֹד וְתַאֲוָתָם יָבִא לָהֶם׃
ל   לֹא זָרוּ מִתַּאֲוָתָם עוֹד אָכְלָם בְּפִיהֶם׃
לא  וְאַף יְהוָה עָלָה בָהֶם 
      וַיַּהֲרֹג בְּמִשְׁמַנֵּיהֶם וּבַחוּרֵי יִשְׂרָאֵל הִכְרִיעַ׃
לב  בְּכָל זֹאת חָטְאוּ עוֹד וְלֹא הֶאֱמִינוּ בְּנִפְלְאוֹתָיו׃
לג   וַיְכַל בַּהֶבֶל יְמֵיהֶם וּשְׁנוֹתָם בַּבְהָלָה׃
לד  אִם הֲרָגָם וּדְרָשׁוּהוּ וְשָׁבוּ וְשִׁחֲרוּ אֵל׃
לה  וַיִּזְכְּרוּ כִּי יְהֹוָה צוּרָם וְאֵל עֶלְיוֹן גֹּאֲלָם׃
לו   וַיְפַתּוּהוּ בְּפִיהֶם וּבִלְשׁוֹנָם יְכַזְּבוּ לוֹ׃
לז   וְלִבָּם לֹא נָכוֹן עִמּוֹ וְלֹא נֶאֶמְנוּ בִּבְרִיתוֹ׃
לח  וְהוּא רַחוּם יְכַפֵּר עָוֹן וְלֹא יַשְׁחִית     
      וְהִרְבָּה לְהָשִׁיב אַפּוֹ וְלֹא יָעִיר כָּל חֲמָתוֹ׃
לט  וַיִּזְכֹּר כִּי בָשָׂר הֵמָּה רוּחַ הוֹלֵךְ וְלֹא יָשׁוּב׃
מ    כַּמָּה יַמְרוּהוּ בַמִּדְבָּר יַעֲצִיבוּהוּ בִּישִׁימוֹן׃
מא  וַיָּשׁוּבוּ וַיְנַסּוּ אֵל וּקְדוֹשׁ יִשְׂרָאֵל הִתְווּ׃
מב  לֹא זָכְרוּ אֶת יָדוֹ יוֹם אֲשֶׁר פָּדָם מִנִּי צָר׃
מג   אֲשֶׁר שָׂם בְּמִצְרַיִם אֹתוֹתָיו וּמוֹפְתָיו בִּשְׂדֵה צֹעַן׃
מד  וַיַּהֲפֹךְ לְדָם יְאֹרֵיהֶם וְנֹזְלֵיהֶם בַּל יִשְׁתָּיוּן׃ 
מה  יְשַׁלַּח בָּהֶם עָרֹב וַיֹּאכְלֵם וּצְפַרְדֵּעַ וַתַּשְׁחִיתֵם׃
מו   וַיִּתֵּן לֶחָסִיל יְבוּלָם וִיגִיעָם לָאַרְבֶּה׃
מז   יַהֲרֹג בַּבָּרָד גַּפְנָם וְשִׁקְמוֹתָם בַּחֲנָ מַל׃
מח   וַיַּסְגֵּר לַבָּרָד בְּעִירָם וּמִקְנֵיהֶם לָרְשָׁפִים׃
מט  יְשַׁלַּח בָּם חֲרוֹן אַפּוֹ עֶבְרָה וָזַעַם וְצָרָה מִשְׁלַחַת מַלְאֲכֵי רָעִים׃ 
נ     יְפַלֵּס נָתִיב לְאַפּוֹ לֹא חָשַׂךְ מִמָּוֶת נַפְשָׁם וְחַיָּתָם לַדֶּבֶר הִסְגִּיר׃
נא   וַיַּךְ כָּל בְּכוֹר בְּמִצְרָיִם רֵאשִׁית אוֹנִים בְּאָהֳלֵי חָם׃
נב   וַיַּסַּע כַּצֹּאן עַמּוֹ וַיְנַהֲגֵם כַּעֵדֶר בַּמִּדְבָּר׃
נג    וַיַּנְחֵם לָבֶטַח וְלֹא פָחָדוּ וְאֶת אוֹיְבֵיהֶם כִּסָּה הַיָּם׃
נד   וַיְבִיאֵם אֶל גְּבוּל קָדְשׁוֹ הַר זֶה קָנְתָה יְמִינוֹ׃
נה   וַיְגָרֶשׁ מִפְּנֵיהֶם גּוֹיִם וַיַּפִּילֵם בְּחֶבֶל נַחֲלָה      
      וַיַּשְׁכֵּן בְּאָהֳלֵיהֶם שִׁבְטֵי יִשְׂרָאֵל׃
נו    וַיְנַסּוּ וַיַּמְרוּ אֶת יְהוָה עֶלְיוֹן וְעֵדוֹתָיו לֹא שָׁמָרוּ׃
נז    וַיִּסֹּגוּ וַיִּבְגְּדוּ כַּאֲבוֹתָם נֶהְפְּכוּ כְּקֶשֶׁת רְמִיָּה׃
נח   וַיַּכְעִיסוּהוּ בְּבָמוֹתָם וּבִפְסִילֵיהֶם יַקְנִיאוּהוּ׃
נט   שָׁמַע יְהוָה וַיִּתְעַבָּר וַיִּמְאַס מְאֹד בְּיִשְׂרָאֵל׃
ס    וַיִּטֹּשׁ מִשְׁכַּן שִׁלוֹ אֹהֶל שִׁכֵּן בָּאָדָם׃
סא   וַיִּתֵּן לַשְּׁבִי עֻזּוֹ וְתִפְאַרְתּוֹ בְיַד צָר׃
סב   וַיַּסְגֵּר לַחֶרֶב עַמּוֹ וּבְנַחֲלָתוֹ הִתְעַבָּר׃
סג    בַּחוּרָיו אָכְלָה אֵשׁ וּבְתוּלֹתָיו לֹא הוּלָּלוּ׃
סד   כֹּהֲנָיו בַּחֶרֶב נָפָלוּ וְאַלְמְנֹתָיו לֹא תִבְכֶּינָה׃
סה   וַיִּקַץ כְּיָשֵׁן יהוה כְּגִבּוֹר מִתְרוֹנֵן מִיָּיִן׃
סו    וַיַּךְ צָרָיו אָחוֹר חֶרְפַּת עוֹלָם נָתַן לָמוֹ׃
סז   וַיִּמְאַס בְּאֹהֶל יוֹסֵף וּבְשֵׁבֶט אֶפְרַיִם לֹא בָחָר׃
סח  וַיִּבְחַר אֶת שֵׁבֶט יְהוּדָה אֶת הַר צִיּוֹן אֲשֶׁר אָהֵב׃
סט  וַיִּבֶן כְּמוּרָמִים מִקְדָּשׁוֹ כְּאֶרֶץ יְסָדָהּ לְעוֹלָם׃
ע    וַיִּבְחַר בְּדָוִד עַבְדּוֹ וַיִּקָּחֵהוּ מִמִּכְלְאֹת צֹאן׃
עא   מֵאַחַר עָלוֹת הֱבִיאוֹ לִרְעוֹת בְּיַעֲקֹב עַמּוֹ וּבְיִשְׂרָאֵל נַחֲלָתוֹ׃
עב   וַיִּרְעֵם כְּתֹם לְבָבוֹ וּבִתְבוּנוֹת כַּפָּיו יַנְחֵם׃

 

מזמור צט


א   יְהוָה מָלָךְ יִרְגְּזוּ עַמִּים    

     יֹשֵׁב כְּרוּבִים תָּנוּט הָאָרֶץ׃
ב   יְהוָה בְּצִיּוֹן גָּדוֹל       

     וְרָם הוּא עַל כָּל הָעַמִּים׃
ג    יוֹדוּ שִׁמְךָ גָּדוֹל וְנוֹרָא  קָדוֹשׁ הוּא׃
ד   וְעֹז מֶלֶךְ מִשְׁפָּט אָהֵב  

     אַתָּה כּוֹנַנְתָּ מֵישָׁרִים    

     מִשְׁפָּט וּצְדָקָה בְּיַעֲקֹב אַתָּה עָשִׂיתָ׃
ה   רוֹמְמוּ יְהוָה אֱלֹהֵינוּ

     וְהִשְׁתַּחֲווּ לַהֲדֹם רַגְלָיו קָדוֹשׁ הוּא׃
ו    מֹשֶׁה וְאַהֲרֹן בְּכֹהֲנָיו וּשְׁמוּאֵל בְּקֹרְאֵי שְׁמוֹ  

     קֹראים אֶל יְהוָה וְהוּא יַעֲנֵם׃
ז    בְּעַמּוּד עָנָן יְדַבֵּר אֲלֵיהֶם    

     שָׁמְרוּ עֵדֹתָיו וְחֹק נָתַן לָמוֹ׃
ח   יְהוָה אֱלֹהֵינוּ אַתָּה עֲנִיתָם    

     אֵל נֹשֵׂא הָיִיתָ לָהֶם:
ט   רוֹמְמוּ יְהוָה אֱלֹהֵינוּ    

     וְהִשְׁתַּחֲווּ לְהַר קָדְשׁוֹ    

     כִּי קָדוֹשׁ יְהוָה אֱלֹהֵינוּ׃

 


פרק קה


א   הוֹדוּ לַיהוָה קִרְאוּ בִשְׁמוֹ      הוֹדִיעוּ בָעַמִּים עֲלִילוֹתָיו׃
ב   שִׁירוּ לוֹ זַמְּרוּ לוֹ     שִׂיחוּ בְּכָל נִפְלְאוֹתָיו׃
ג    הִתְהַלְלוּ בְּשֵׁם קָדְשׁוֹ     יִשְׂמַח לֵב מְבַקְשֵׁי יְהוָה׃
ד   דִּרְשׁוּ יְהוָה וְעֻזּוֹ     בַּקְּשׁוּ פָנָיו תָּמִיד׃
ה   זִכְרוּ נִפְלְאוֹתָיו אֲשֶׁר עָשָׂה     מֹפְתָיו וּמִשְׁפְּטֵי פִיו׃
ו    זֶרַע אַבְרָהָם עַבְדּוֹ     בְּנֵי יַעֲקֹב בְּחִירָיו׃
ז    הוּא יְהוָה אֱלֹהֵינוּ     בְּכָל הָאָרֶץ מִשְׁפָּטָיו׃
ח   זָכַר לְעוֹלָם בְּרִיתוֹ     דָּבָר צִוָּה לְאֶלֶף דּוֹר׃
ט   אֲשֶׁר כָּרַת אֶת אַבְרָהָם     וּשְׁבוּעָתוֹ לְיִשְׂחָק׃
י    וַיַּעֲמִידֶהָ לְיַעֲקֹב לְחֹק         לְיִשְׂרָאֵל בְּרִית עוֹלָם׃
יא  לֵאמֹר לְךָ אֶתֵּן אֶת אֶרֶץ כְּנָעַן     חֶבֶל נַחֲלַתְכֶם׃
יב  בִּהְיוֹתָם מְתֵי מִסְפָּר    כִּמְעַט וְגָרִים בָּהּ׃
יג   וַיִּתְהַלְּכוּ מִגּוֹי אֶל גּוֹי     מִמַּמְלָכָה אֶל עַם אַחֵר׃
יד  לֹא הִנִּיחַ אָדָם לְעָשְׁקָם     וַיּוֹכַח עֲלֵיהֶם מְלָכִים׃
טו  אַל תִּגְּעוּ בִמְשִׁיחָי     וְלִנְבִיאַי אַל תָּרֵעוּ׃
טז   וַיִּקְרָא רָעָב עַל הָאָרֶץ     כָּל מַטֵּה לֶחֶם שָׁבָר׃
יז    שָׁלַח לִפְנֵיהֶם אִישׁ     לְעֶבֶד נִמְכַּר יוֹסֵף׃
יח   עִנּוּ בַכֶּבֶל רגליו     בַּרְזֶל בָּאָה נַפְשׁוֹ׃  
יט   עַד עֵת בֹּא דְבָרוֹ      אִמְרַת יְהוָה צְרָפָתְהוּ׃
כ    שָׁלַח מֶלֶךְ וַיַתִּירֵהוּ     מֹשֵׁל עַמִּים וַיְפַתְּחֵהוּ׃
כא  שָׂמוֹ אָדוֹן לְבֵיתוֹ     וּמֹשֵׁל בְּכָל קִנְיָנוֹ׃
כב  לֶאְסֹר שָׂרָיו בְּנַפְשׁוֹ     וּזְקֵנָיו יְחַכֵּם׃
כג   וַיָּבֹא יִשְׂרָאֵל מִצְרָיִם     וְיַעֲקֹב גָּר בְּאֶרֶץ חָם׃
כד  וַיֶּפֶר אֶת עַמּוֹ מְאֹד      וַיַּעֲצִמֵהוּ מִצָּרָיו׃
כה  הָפַךְ לִבָּם לִשְׂנֹא עַמּוֹ     לְהִתְנַכֵּל בַּעֲבָדָיו׃
כו   שָׁלַח מֹשֶׁה עַבְדּוֹ      אהֲרֹן אֲשֶׁר בָּחַר בּוֹ׃
כז   שָׂמוּ בָם דִּבְרֵי אֹתוֹתָיו     וּמֹפְתִים בְּאֶרֶץ חָם׃
כח  שָׁלַח חֹשֶׁךְ וַיַּחְשִׁךְ          וְלֹא מָרוּ אֶת דבריו׃  
כט  הָפַךְ אֶת מֵימֵיהֶם לְדָם     וַיָּמֶת אֶת דְּגָתָם׃
ל    שָׁרַץ אַרְצָם צְפַרְדְּעִים     בְּחַדְרֵי מַלְכֵיהֶם׃
לא  אָמַר וַיָּבֹא עָרֹב     כִּנִּים בְּכָל גְּבוּלָם׃
לב  נָתַן גִּשְׁמֵיהֶם בָּרָד    אֵשׁ לֶהָבוֹת בְּאַרְצָם׃
לג   וַיַּךְ גַּפְנָם וּתְאֵנָתָם    וַיְשַׁבֵּר עֵץ גְּבוּלָם׃
לד  אָמַר וַיָּבֹא אַרְבֶּה     וְיֶלֶק וְאֵין מִסְפָּר׃
לה  וַיֹּאכַל כָּל עֵשֶׂב בְּאַרְצָם     וַיֹּאכַל פְּרִי אַדְמָתָם׃
לו   וַיַּךְ כָּל בְּכוֹר בְּאַרְצָם    רֵאשִׁית לְכָל אוֹנָם׃
לז    וַיּוֹצִיאֵם בְּכֶסֶף וְזָהָב      וְאֵין בִּשְׁבָטָיו כּוֹשֵׁל׃
לח  שָׂמַח מִצְרַיִם בְּצֵאתָם     כִּי נָפַל פַּחְדָּם עֲלֵיהֶם׃
לט   פָּרַשׂ עָנָן לְמָסָךְ     וְאֵשׁ לְהָאִיר לָיְלָה׃
מ    שָׁאַל וַיָּבֵא שְׂלָו      וְלֶחֶם שָׁמַיִם יַשְׂבִּיעֵם׃
מא   פָּתַח צוּר וַיָּזוּבוּ מָיִם     הָלְכוּ בַּצִּיּוֹת נָהָר׃
מב   כִּי זָכַר אֶת דְּבַר קָדְשׁוֹ     אֶת אַבְרָהָם עַבְדּוֹ׃
מג    וַיּוֹצִא עַמּוֹ בְשָׂשׂוֹן     בְּרִנָּה אֶת בְּחִירָיו׃
מד   וַיִּתֵּן לָהֶם אַרְצוֹת גּוֹיִם     וַעֲמַל לְאֻמִּים יִירָשׁוּ׃
מה   בַּעֲבוּר יִשְׁמְרוּ חֻקָּיו.    וְתוֹרֹתָיו יִנְצֹרוּ     הַלְלוּ יָהּ׃

 


קו


א   הַלְלוּ יָהּ הוֹדוּ לַיהוָה    כִּי טוֹב כִּי לְעוֹלָם חַסְדּוֹ׃
ב   מִי יְמַלֵּל גְּבוּרוֹת יְהוָה    יַשְׁמִיעַ כָּל תְּהִלָּתוֹ׃
ג    אַשְׁרֵי שֹׁמְרֵי מִשְׁפָּט     עֹשֵׂה צְדָקה בְכָל עֵת׃
ד   זָכְרֵנִי יְהוָה בִּרְצוֹן עַמֶּךָ    פָּקְדֵנִי בִּישׁוּעָתֶךָ׃
ה   לִרְאוֹת בְּטוֹבַת בְּחִירֶיךָ    

     לִשְׂמֹחַ בְּשִׂמְחַת גּוֹיֶךָ לְהִתְהַלֵּל עִם נַחֲלָתֶךָ׃
ו    חָטָאנוּ עִם אֲבוֹתֵינוּ     הֶעֱוִינוּ הִרְשָׁעְנוּ׃
ז    אֲבוֹתֵינוּ בְמִצְרַיִם לֹא הִשְׂכִּילוּ נִפְלְאוֹתֶיךָ    

     לֹא זָכְרוּ אֶת רֹב חֲסָדֶיךָ    וַיַּמְרוּ עַל יָם בְּיַם סוּף׃
ח    וַיּוֹשִׁיעֵם לְמַעַן שְׁמוֹ    לְהוֹדִיעַ אֶת גְּבוּרָתוֹ׃
ט    וַיִּגְעַר בְּיַם סוּף וַיֶּחֱרָב    וַיּוֹלִיכֵם בַּתְּהֹמוֹת כַּמִּדְבָּר׃
י     וַיּוֹשִׁיעֵם מִיַּד שׂוֹנֵא     וַיִּגְאָלֵם מִיַּד אוֹיֵב׃
יא   וַיְכַסּוּ מַיִם צָרֵיהֶם     אֶחָד מֵהֶם לֹא נוֹתָר׃
יב   וַיַּאֲמִינוּ בִדְבָרָיו         יָשִׁירוּ תְּהִלָּתוֹ׃
יג    מִהֲרוּ שָׁכְחוּ מַעֲשָׂיו     לֹא חִכּוּ לַעֲצָתוֹ׃
יד   וַיִּתְאַוּוּ תַאֲוָה בַּמִּדְבָּר    וַיְנַסּוּ אֵל בִּישִׁימוֹן׃
טו   וַיִּתֵּן לָהֶם שֶׁאֱלָתָם     וַיְשַׁלַּח רָזוֹן בְּנַפְשָׁם׃
טז   וַיְקַנְאוּ לְמֹשֶׁה בַּמַּחֲנֶה     לְאַהֲרֹן קְדוֹשׁ יְהוָה׃
יז    תִּפְתַּח אֶרֶץ וַתִּבְלַע דָּתָן     וַתְּכַס עַל עֲדַת אֲבִירָם׃
יח   וַתִּבְעַר אֵשׁ בַּעֲדָתָם     לֶהָבָה תְּלַהֵט רְשָׁעִים׃
יט   יַעֲשׂוּ עֵגֶל בְּחֹרֵב     וַיִּשְׁתַּחֲווּ לְמַסֵּכָה׃
כ    וַיָּמִירוּ אֶת כְּבוֹדו     בְּתַבְנִית שׁוֹר אֹכֵל עֵשֶׂב׃
כא  שָׁכְחוּ אֵל מוֹשִׁיעָם     עֹשֶׂה גְדֹלוֹת בְּמִצְרָיִם׃
כב  נִפְלָאוֹת בְּאֶרֶץ חָם     נוֹרָאוֹת עַל יַם סוּף׃
כג   וַיֹּאמֶר לְהַשְׁמִידָם     לוּלֵי מֹשֶׁה בְחִירוֹ    

      עָמַד בַּפֶּרֶץ לְפָנָיו    לְהָשִׁיב חֲמָתוֹ מֵהַשְׁחִית׃
כד  וַיִּמְאֲסוּ בְּאֶרֶץ חֶמְדָּה     לֹא הֶאֱמִינוּ לִדְבָרוֹ׃
כה   וַיֵּרָגְנוּ בְאלהֵיהֶם     לֹא שָׁמְעוּ בְּקוֹל יְהוָה׃
כו    וַיִּשָּׂא יָדוֹ לָהֶם     לְהַפִּיל אוֹתָם בַּמִּדְבָּר׃
כז    וּלְהַפִּיל זַרְעָם בַּגּוֹיִם   וּלְזָרוֹתָם בָּאֲרָצוֹת׃
כח   וַיִּצָּמְדוּ לְבַעַל פְּעוֹר    וַיֹּאכְלוּ זִבְחֵי מֵתִים׃
כט   וַיַּכְעִיסוּ בְּמַעַלְלֵיהֶם     וַתִּפְרָץ בָּם מַגֵּפָה׃
ל     וַיַּעֲמֹד פִּינְחָס וַיְפַלֵּל      וַתֵּעָצַר הַמַּגֵּפָה׃
לא   וַתֵּחָשֶׁב לוֹ לִצְדָקָה     לְדֹר וָדֹר עַד עוֹלָם׃
לב   וַיַּקְצִיפוּ עַל מֵי מְרִיבָה     וַיֵּרַע לְמֹשֶׁה בַּעֲבוּרָם׃
לג    כִּי הֵמַרוּ אֶת רוּחוֹ     וַיְבַטֵּא בִּשְׂפָתָיו׃
לד   לֹא הִשְׁמִידוּ אֶת הָעַמִּים     אֲשֶׁר אָמַר יְהוָה לָהֶם׃
לה   וַיִּתְעָרְבוּ בַגּוֹיִם      וַיִּלְמְדוּ מַעֲשֵׂיהֶם׃
לו    וַיַּעַבְדוּ אֶת עֲצַבֵּיהֶם     וַיִּהְיוּ לָהֶם לְמוֹקֵשׁ׃
לז    וַיִּזְבְּחוּ אֶת בְּנֵיהֶם וְאֶת בְּנוֹתֵיהֶם לַשֵּׁדִים   וַיִּשְׁפְּכוּ דָם נָקִי׃ 
לח   דַּם בְּנֵיהֶם וּבְנוֹתֵיהֶם אֲשֶׁר זִבְּחוּ לַעֲצַבֵּי כְנָעַן    

       וַתֶּחֱנַף הָאָרֶץ בַּדָּמִים:
לט   וַיִּטְמְאוּ בְמַעֲשֵׂיהֶם     וַיִּזְנוּ בְּמַעַלְלֵיהֶם׃
מ     וַיִּחַר אַף יְהוָה בְּעַמּוֹ     וַיְתָעֵב אֶת נַחֲלָתוֹ׃
מא   וַיִּתְּנֵם בְּיַד גּוֹיִם     וַיִּמְשְׁלוּ בָהֶם שֹׂנְאֵיהֶם׃
מב   וַיִּלְחָצוּם אוֹיְבֵיהֶם     וַיִּכָּנְעוּ תַּחַת יָדָם׃
מג    פְּעָמִים רַבּוֹת יַצִּילֵם     וְהֵמָּה יַמְרוּ בַעֲצָתָם וַיָּמֹכּוּ בַּעֲוֹנָם׃
מד   וַיַּרְא בַּצַּר לָהֶם     בְּשָׁמְעוֹ אֶת רִנָּתָם׃
מה   וַיִּזְכֹּר לָהֶם בְּרִיתוֹ     וַיִּנָּחֵם כְּרֹב חֲסָדו׃
מו    וַיִּתֵּן אוֹתָם לְרַחֲמִים    לִפְנֵי כָּל שׁוֹבֵיהֶם׃
מז    הוֹשִׁיעֵנוּ יְהוָה אֱלֹהֵינוּ   וְקַבְּצֵנוּ מִן הַגּוֹיִם     
       לְהֹדוֹת לְשֵׁם קָדְשֶׁךָ     לְהִשְׁתַּבֵּחַ בִּתְהִלָּתֶךָ׃
מח   בָּרוּךְ יְהוָה אֱלֹהֵי יִשְׂרָאֵל מִן הָעוֹלָם וְעַד הָעוֹלָם    

       וְאָמַר כָּל הָעָם אָמֵן 
       הַלְלוּ יָהּ׃

 

 

פרק קיד


א  בְּצֵאת יִשְׂרָאֵל מִמִּצְרָיִם     בֵּית יַעֲקֹב מֵעַם לֹעֵז׃
ב  הָיְתָה יְהוּדָה לְקָדְשׁוֹ      יִשְׂרָאֵל מַמְשְׁלוֹתָיו׃
ג   הַיָּם רָאָה וַיָּנֹס     הַיַּרְדֵּן יִסֹּב לְאָחוֹר׃
ד  הֶהָרִים רָקְדוּ כְאֵילִים     גְּבָעוֹת כִּבְנֵי צֹאן׃
ה  מַה לְּךָ הַיָּם כִּי תָנוּס     הַיַּרְדֵּן תִּסֹּב לְאָחוֹר׃
ו   הֶהָרִים תִּרְקְדוּ כְאֵילִים    גְּבָעוֹת כִּבְנֵי צֹאן׃
ז   מִלִּפְנֵי יְהוָה חוּלִי אָרֶץ     מִלִּפְנֵי אֱלוֹהַּ יַעֲקֹב׃
ח  הַהֹפְכִי הַצּוּר אֲגַם מָיִם     חַלָּמִישׁ לְמַעְיְנוֹת מָיִם׃

 

 

 

פרק קלד+קלה


א   הִנֵּה בָּרְכוּ אֶת יְהוָה  כָּל עַבְדֵי יְהוָה    

     הָעֹמְדִים בְּבֵית יְהוָה בַּלֵּילוֹת׃
ב   שְׂאוּ יְדֵכֶם קֹדֶשׁ וּבָרְכוּ אֶת יְהוָה׃
ג    יְבָרֶכְךָ יְהוָה מִצִּיּוֹן עֹשֵׂה שָׁמַיִם וָאָרֶץ׃
א   הַלְלוּ אֶת שֵׁם יְהוָה      הַלְלוּ עַבְדֵי יְהוָה׃
ב   שֶׁעֹמְדִים בְּבֵית יְהוָה      בְּחַצְרוֹת בֵּית אֱלֹהֵינוּ׃
ג    הַלְלוּ יָהּ כִּי טוֹב יְהוָה     זַמְּרוּ לִשְׁמוֹ כִּי נָעִים׃
ד   כִּי יַעֲקֹב בָּחַר לוֹ יָהּ     יִשְׂרָאֵל לִסְגֻלָּתוֹ׃
ה   כִּי אֲנִי יָדַעְתִּי כִּי גָדוֹל יְהוָה וַאֲדֹנֵינוּ מִכָּל אֱלֹהִים׃
ו    כֹּל אֲשֶׁר חָפֵץ יְהוָה עָשָׂה בַּשָּׁמַיִם וּבָאָרֶץ בַּיַּמִּים וְכָל תְּהֹמוֹת׃
ז    מַעֲלֶה נְשִׂאִים מִקְצֵה הָאָרֶץ     בְּרָקִים לַמָּטָר עָשָׂה     מוֹצִא רוּחַ מֵאוֹצְרוֹתָיו׃
ח   שֶׁהִכָּה בְּכוֹרֵי מִצְרָיִם     מֵאָדָם עַד בְּהֵמָה׃
ט   שָׁלַח אוֹתֹת וּמֹפְתִים בְּתוֹכֵכִי מִצְרָיִם    בְּפַרְעֹה וּבְכָל עֲבָדָיו׃
י    שֶׁהִכָּה גּוֹיִם רַבִּים וְהָרג מְלָכִים עֲצוּמִים׃
יא   לְסִיחוֹן מֶלֶךְ הָאֱמֹרִי וּלְעוֹג מֶלֶךְ הַבָּשָׁן     וּלְכֹל מַמְלְכוֹת כְּנָעַן׃
יב   וְנָתַן אַרְצָם נַחֲלָה      נַחֲלָה לְיִשְׂרָאֵל עַמּוֹ׃
יג   יְהוָה שִׁמְךָ לְעוֹלָם     יְהוָה זִכְרְךָ לְדֹר וָדֹר׃
יד   כִּי יָדִין יְהוָה עַמּוֹ     וְעַל עֲבָדָיו יִתְנֶחָם׃
טו   עֲצְבֵּי הַגּוֹיִם כֶּסֶף וְזָהָב      מַעֲשֵׂה יְדֵי אָדָם׃
טז   פֶּה לָהֶם וְלֹא יְדַבֵּרוּ     עֵינַיִם לָהֶם וְלֹא יִרְאוּ׃
יז    אָזְנַיִם לָהֶם וְלֹא יַאֲזִינוּ     אַף אֵין רוּחַ בְּפִיהֶם׃ 
יח   כְּמוֹהֶם יִהְיוּ עֹשֵׂיהֶם      כֹּל אֲשֶׁר בֹּטֵחַ בָּהֶם׃
יט   בֵּית יִשְׂרָאֵל בָּרְכוּ אֶת יְהוָה     בֵּית אַהֲרֹן בָּרְכוּ אֶת יְהוָה׃
כ    בֵּית הַלֵּוִי בָּרְכוּ אֶת יְהוָה     יִרְאֵי יְהוָה בָּרְכוּ אֶת יְהוָה׃
כא  בָּרוּךְ יְהוָה מִצִּיּוֹן שֹׁכֵן יְרוּשָׁלָם  הַלְלוּ יָהּ׃

 

 

פרק קלו


א  הוֹדוּ לַיהוָה כִּי טוֹב    כִּי לְעוֹלָם חַסְדּוֹ׃
ב  הוֹדוּ לֵאלֹהֵי הָאֱלֹהִים    כִּי לְעוֹלָם חַסְדּוֹ׃
ג   הוֹדוּ לַאֲדֹנֵי הָאֲדֹנִים    כִּי לְעוֹלָם חַסְדּוֹ׃
ד  לְעֹשֵׂה נִפְלָאוֹת גְּדֹלוֹת לְבַדּוֹ    כִּי לְעוֹלָם חַסְדּוֹ׃
ה  לְעֹשֵׂה הַשָּׁמַיִם בִּתְבוּנָה    כִּי לְעוֹלָם חַסְדּוֹ׃
ו   לְרֹקַע הָאָרֶץ עַל הַמָּיִם    כִּי לְעוֹלָם חַסְדּוֹ׃
ז   לְעֹשֵׂה אוֹרִים גְּדֹלִים    כִּי לְעוֹלָם חַסְדּוֹ׃
ח   אֶת הַשֶּׁמֶשׁ לְמֶמְשֶׁלֶת בַּיּוֹם    כִּי לְעוֹלָם חַסְדּוֹ׃
ט   אֶת הַיָּרֵחַ וְכוֹכָבִים לְמֶמְשְׁלוֹת בַּלָּיְלָה    כִּי לְעוֹלָם חַסְדּוֹ׃
י    לְמַכֵּה מִצְרַיִם בִּבְכוֹרֵיהֶם    כִּי לְעוֹלָם חַסְדּוֹ׃
יא   וַיּוֹצֵא יִשְׂרָאֵל מִתּוֹכָם    כִּי לְעוֹלָם חַסְדּוֹ׃
יב   בְּיָד חֲזָקָה וּבִזְרוֹעַ נְטוּיָה    כִּי לְעוֹלָם חַסְדּוֹ׃
יג    לְגֹזֵר יַם סוּף לִגְזָרִים    כִּי לְעוֹלָם חַסְדּוֹ׃
יד   וְהֶעֱבִיר יִשְׂרָאֵל בְּתוֹכוֹ    כִּי לְעוֹלָם חַסְדּוֹ׃
טו   וְנִעֵר פַּרְעֹה וְחֵילוֹ בְיַם סוּף    כִּי לְעוֹלָם חַסְדּוֹ׃
טז   לְמוֹלִיךְ עַמּוֹ בַּמִּדְבָּר    כִּי לְעוֹלָם חַסְדּוֹ׃
יז    לְמַכֵּה מְלָכִים גְּדֹלִים    כִּי לְעוֹלָם חַסְדּוֹ׃
יח    וַיַּהֲרֹג מְלָכִים אַדִּירִים    כִּי לְעוֹלָם חַסְדּוֹ׃
יט    לְסִיחוֹן מֶלֶךְ הָאֱמֹרִי    כִּי לְעוֹלָם חַסְדּוֹ׃
כ     וּלְעוֹג מֶלֶךְ הַבָּשָׁן    כִּי לְעוֹלָם חַסְדּוֹ׃
כא    וְנָתַן אַרְצָם לְנַחֲלָה    כִּי לְעוֹלָם חַסְדּוֹ׃
כב   נַחֲלָה לְיִשְׂרָאֵל עַבְדּוֹ    כִּי לְעוֹלָם חַסְדּוֹ׃
כג    שֶׁבְּשִׁפְלֵנוּ זָכַר לָנוּ    כִּי לְעוֹלָם חַסְדּוֹ׃
כד   וַיִּפְרְקֵנוּ מִצָּרֵינוּ    כִּי לְעוֹלָם חַסְדּוֹ׃
כה    נֹתֵן לֶחֶם לְכָל בָּשָׂר    כִּי לְעוֹלָם חַסְדּוֹ׃
כו     הוֹדוּ לְאֵל הַשָּׁמָיִם    כִּי לְעוֹלָם חַסְדּוֹ׃
א      הוֹדוּ לַיהוָה כִּי טוֹב    כִּי לְעוֹלָם חַסְדּוֹ׃

 

 
 
 
 
 
 

עוד על ספר תהלות

תהִלות ולא תהילים
מדוע אומרים תהלים ולא תהלות, ואיך עשרת הדברים הפכו לעשרת הדברות? המאמר מסביר מדוע התופעה אינה מקרית.
תהלות על יציאת מצרים
יציאת מצרים מתוארת בספר תהלות באופן שונה מזה שבתורה. בטבלה מפורטים שלבי היציאה ולצדם תאור הארוע מתהלות.
מזמור קיט
מזמור קיט ממויין לשמונת הנושאים הראשיים בו: עדות, מצוות, פקודים, תורה, משפטים, אמרות, דברים וחוקים. קל לניווט וללא טעמים.