בְּרֵאשִׁית בָּרָא אֱלֹהִים אֵת הַשָּׁמַיִם וְאֵת הָאָרֶץ

{ד} אֵיפֹה הָיִיתָ בְּיָסְדִי אָרֶץ הַגֵּד אִם יָדַעְתָּ בִינָה:

{ה} מִי שָׂם מְמַדֶּיהָ כִּי תֵדָע אוֹ מִי נָטָה עָלֶיהָ קָּו:

{ו} עַל מָה אֲדָנֶיהָ הָטְבָּעוּ אוֹ מִי יָרָה אֶבֶן פִּנָּתָהּ:

{ז} בְּרָן יַחַד כּוֹכְבֵי בֹקֶר וַיָּרִיעוּ כָּל בְּנֵי אֱלֹהִים:

{ח} וַיָּסֶךְ בִּדְלָתַיִם יָם בְּגִיחוֹ מֵרֶחֶם יֵצֵא:

{ט} בְּשׂוּמִי עָנָן לְבֻשׁוֹ וַעֲרָפֶל חֲתֻלָּתוֹ:

{י} וָאֶשְׁבֹּר עָלָיו חֻקִּי וָאָשִׂים בְּרִיחַ וּדְלָתָיִם:

{יא} וָאֹמַר עַד פֹּה תָבוֹא וְלֹא תֹסִיף וּפֹא יָשִׁית בִּגְאוֹן גַּלֶּיךָ:

{יב} הְמִיָּמֶיךָ צִוִּיתָ בֹּקֶר (ידעתה) (שחר) יִדַּעְתָּ הַשַּׁחַר מְקֹמוֹ:

{יג} לֶאֱחֹז בְּכַנְפוֹת הָאָרֶץ וְיִנָּעֲרוּ רְשָׁעִים מִמֶּנָּה:

{יד} תִּתְהַפֵּךְ כְּחֹמֶר חוֹתָם וְיִתְיַצְּבוּ כְּמוֹ לְבוּשׁ:

{טו} וְיִמָּנַע מֵרְשָׁעִים אוֹרָם וּזְרוֹעַ רָמָה תִּשָּׁבֵר:

{טז} הֲבָאתָ עַד נִבְכֵי יָם וּבְחֵקֶר תְּהוֹם הִתְהַלָּכְתָּ:

{יז} הֲנִגְלוּ לְךָ שַׁעֲרֵי מָוֶת וְשַׁעֲרֵי צַלְמָוֶת תִּרְאֶה:

{יח} הִתְבֹּנַנְתָּ עַד רַחֲבֵי אָרֶץ הַגֵּד אִם יָדַעְתָּ כֻלָּהּ:

{יט} אֵי זֶה הַדֶּרֶךְ יִשְׁכָּן אוֹר וְחֹשֶׁךְ אֵי זֶה מְקֹמוֹ:

{כ} כִּי תִקָּחֶנּוּ אֶל גְּבוּלוֹ וְכִי תָבִין נְתִיבוֹת בֵּיתוֹ:

{כא} יָדַעְתָּ כִּי אָז תִּוָּלֵד וּמִסְפַּר יָמֶיךָ רַבִּים:

{כב} הֲבָאתָ אֶל אֹצְרוֹת שָׁלֶג וְאֹצְרוֹת בָּרָד תִּרְאֶה:

{כג} אֲשֶׁר חָשַׂכְתִּי לְעֶת צָר לְיוֹם קְרָב וּמִלְחָמָה:

{כד} אֵי זֶה הַדֶּרֶךְ יֵחָלֶק אוֹר יָפֵץ קָדִים עֲלֵי אָרֶץ:

{כה} מִי פִלַּג לַשֶּׁטֶף תְּעָלָה וְדֶרֶךְ לַחֲזִיז קֹלוֹת:

{כו} לְהַמְטִיר עַל אֶרֶץ לֹא אִישׁ מִדְבָּר לֹא אָדָם בּוֹ:

{כז} לְהַשְׂבִּיעַ שֹׁאָה וּמְשֹׁאָה וּלְהַצְמִיחַ מֹצָא דֶשֶׁא:

{כח} הֲיֵשׁ לַמָּטָר אָב אוֹ מִי הוֹלִיד אֶגְלֵי טָל:

{כט} מִבֶּטֶן מִי יָצָא הַקָּרַח וּכְפֹר שָׁמַיִם מִי יְלָדוֹ:

{ל} כָּאֶבֶן מַיִם יִתְחַבָּאוּ וּפְנֵי תְהוֹם יִתְלַכָּדוּ:

{לא} הַתְקַשֵּׁר מַעֲדַנּוֹת כִּימָה אוֹ מֹשְׁכוֹת כְּסִיל תְּפַתֵּחַ:

{לב} הֲתֹצִיא מַזָּרוֹת בְּעִתּוֹ וְעַיִשׁ עַל בָּנֶיהָ תַנְחֵם:

{לג} הֲיָדַעְתָּ חֻקּוֹת שָׁמָיִם אִם תָּשִׂים מִשְׁטָרוֹ בָאָרֶץ:

{לד} הֲתָרִים לָעָב קוֹלֶךָ וְשִׁפְעַת מַיִם תְּכַסֶּךָּ:

איוב לח

{לה} הַתְשַׁלַּח בְּרָקִים וְיֵלֵכוּ וְיֹאמְרוּ לְךָ הִנֵּנוּ:

{לו} מִי שָׁת בַּטֻּחוֹת חָכְמָה אוֹ מִי נָתַן לַשֶּׂכְוִי בִינָה:

{לז} מִי יְסַפֵּר שְׁחָקִים בְּחָכְמָה וְנִבְלֵי שָׁמַיִם מִי יַשְׁכִּיב:

{לח} בְּצֶקֶת עָפָר לַמּוּצָק וּרְגָבִים יְדֻבָּקוּ:

החכמה מספר משלי

יְהוָה קָנָנִי רֵאשִׁית דַּרְכּוֹ    קֶדֶם מִפְעָלָיו מֵאָז׃


מֵעוֹלָם נִסַּכְתִּי מֵרֹאשׁ מִקַּדְמֵי אָרֶץ׃


בְּאֵין תְּהֹמוֹת חוֹלָלְתִּי    בְּאֵין מַעְיָנוֹת נִכְבַּדֵּי מָיִם׃


בְּטֶרֶם הָרִים הָטְבָּעוּ    לִפְנֵי גְבָעוֹת חוֹלָלְתִּי׃

עֹד לֹא עָשָׂה אֶרֶץ וְחוּצוֹת    וְרֹאשׁ עַפְרוֹת תֵּבֵל׃ עַד

בַּהֲכִינוֹ שָׁמַיִם שָׁם אָנִי    בְּחֻקוֹ חוּג עַל פְּנֵי תְהוֹם׃


בְּאַמְּצוֹ שְׁחָקִים מִמָּעַל    בַּעֲזוֹז עִינוֹת תְּהוֹם׃


בְּשׂוּמוֹ לַיָּם חֻקּוֹ וּמַיִם לֹא יַעַבְרוּ פִיו׃


בּחוּקוֹ מוֹסְדֵי אָרֶץ וָאֶהְיֶה אֶצְלוֹ אמון:  

וָאֶהְיֶה שַׁעֲשׁוּעִים יוֹם יוֹם מְשַׂחֶקֶת לְפָנָיו בְּכָל עֵת׃


מְשַׂחֶקֶת בְּתֵבֵל אַרְצוֹ    וְשַֽׁעֲשֻׁעַי אֶת בְּנֵי אָדָם׃

(משלי ח,כב-לא) 

״ויקראני ה׳ ויאמר אלי שב חנוך לשמאלי עם גבריאל ואשתחווה לה׳: ויאמר אלי כל אשר תראה חנוך וכל המעמדות והמהלכים מאתי נעשו. ואני בראשונה אודיעך את אשר בראתי מלא היה ואשר בראתי נראה מלא נראה. כי גם למלאכי לא הודעתי רזָי ולא סיפרתי להם על תקומתם והם לא הבינו את בריאת אין הסוף שלי אשר הודעתי לך היום. כי עוד לפני היות כל נראה היתי אני לבדי עובר כשמש ממזרח למערב וממערב למזרח.

ואומר להעמיד את היסודות ולברוא את הבריאה הנראית: ואצו בעליונים כי יצא אחד נראה מלֹא נראים ויצא אוריאל כביר מאד. ואראהו והנה אור כביר בקרבו ואומר אליו המליטה אוריאל ויהי הנולד ממך נראה. ויַמלט ויצא אור כביר וירחף האור ויצא מתוך האור יקום גדול ואראה את כל הבריאה אשר אמרתי לברוא וארא כי טוב: ואעמיד לי כסא ואשב עליו ולאור אמרתי עלה למעלה והתיצבת ממעל לכסא והיית יסוד לעליונים ואין כל ממעל לאור. ואשח עוד ואביט מעל כסאי ואקרא שנית בתחתונים ואומר ויצא מלא־נראים מוצק נראה. ויצא ארכס קשה וכבד ושחור מאד ואומר הפתח ארכס והנולד ממך יהי לא נראה. וימלט ויצא עולם חושך כביר מאד הנושא את כל בריות תחתית. וארא כי טוב ואומר אליו רד למטה והתיצבת והיית יסוד לתחתונים. וירד ויתיצב ויהי יסוד לתחתונים ואין כל דבר מתחת לחושך.

ואֵצו כי יוּקח מן האור ומן החושך ואומר יהי עבה ומסובב אור וארקע אותו ויהי מים. וארקע רקיע ממעל לחושך מתחת לאור וכן ריקעתי את המים והיא תהום. ותבט עיני על אבן חזקה קשה מאד ומברק עיני קיבל הברק תכונת המים והאש: והאש היא במים והמים הם באש ולא אלה יכבו לזאת ולא זאת תיבש לאלה. ולכן הברק הוא חד ומאיר מזוהר השמש ומים רכים קשים מאבן קשה. ומן האבן חצבתי אש גדולה ומן האש בראתי משמרות צבא לא בשר עשרת ריבוא מלאכים ונשקם אש ובגדיהם להבה לוהָטת. לכל צבא השמים יצרתי תכונת אש ואֵצו כי יעמוד כל אחד על משמרתו. וארא כי טוב ואבדיל בין האור ובין החושך לאמור בתוך המים מזה ומזה ואומר לאור הווה יום ולחושך ציויתי כי יהי לילה. היום ההוא ראשית הבריאה קראתיו לי ויהי ערב עוד והיה בוקר והוא יום אחד.

(ספר חנוך ב)

בָּרְכִי נַפְשִׁי אֶת יְהוָה 

יְהוָה אֱלֹהַי גָּדַלְתָּ מְּאֹד הוֹד וְהָדָר לָבָשְׁתָּ׃

עֹטֶה אוֹר כַּשַּׂלְמָה נוֹטֶה שָׁמַיִם כַּיְרִיעָה׃

הַמְקָרֶה בַמַּיִם עֲלִיּוֹתָיו הַשָּׂם עָבִים רְכוּבוֹ 

הַמְהַלֵּךְ עַל כַּנְפֵי רוּחַ׃

עֹשֶׂה מַלְאָכָיו רוּחוֹת מְשָׁרְתָיו אֵשׁ לֹהֵט׃

יָסַד אֶרֶץ עַל מְכוֹנֶיהָ בַּל תִּמּוֹט עוֹלָם וָעֶד׃  (תהלה קד, א-ה)

​