א

{א} הַמַּשָּׂא אֲשֶׁר חָזָה חֲבַקּוּק הַנָּבִיא׃

{ב} עַד אָנָה יְהוָה שִׁוַּעְתִּי וְלֹא תִשְׁמָע

אֶזְעַק אֵלֶיךָ חָמָס וְלֹא תוֹשִׁיעַ׃

{ג} לָמָּה תַרְאֵנִי אָוֶן וְעָמָל תַּבִּיט

וְשֹׁד וְחָמָס לְנֶגְדִּי וַיְהִי רִיב וּמָדוֹן יִשָּׂא׃

{ד} עַל כֵּן תָּפוּג תּוֹרָה וְלֹא יֵצֵא לְנָצֵחַ מִשְׁפָּט

כִּי רָשָׁע מַכְתִּיר אֶת הַצַּדִּיק

עַל כֵּן יֵצֵא מִשְׁפָּט מְעֻקָּל׃

{ה} רְאוּ בַגּוֹיִם וְהַבִּיטוּ וְהִתַּמְּֿהוּ תְּמָֿהוּ

כִּי פֹעַל פֹּעֵל בִּימֵיכֶם הלא תַאֲמִינוּ כִּי יְסֻפָּר׃

{ו} כִּי הִנְנִֿי מֵקִים אֶת הַכַּשְׂדִּים הַגּוֹי הַמַּר וְהַנִּמְהָר

הַהוֹלֵךְ לְמֶרְחֲבֵי אֶרֶץ לָרֶשֶׁת מִשְׁכָּנוֹת לֹּא לוֹ׃

{ז} אָיֹם וְנוֹרָא הוּא מִמֶּנּוּ מִשְׁפָּטוֹ וּשְׂאֵתוֹ יֵצֵא׃

{ח} וְקַלּֿוּ מִנְּמֵרִים סוּסָיו וְחַדּוּֿ מִזְּאֵבֵי עָרֶב

וּפָֿשׁוּ פָּרָשָׁיו וּפָרָשָׁיו מֵרָחוֹק יָבֹאוּ

יָעֻפוּ כְּנֶשֶׁר חָשׁ לֶאֱכוֹל׃

{ט} כֻּלֹּה לְחָמָס יָבוֹא מְגַמַּת פְּנֵיהֶם קָדִימָה

וַיֶּאֱסֹף כַּחוֹל שֶׁבִי׃

{י} וְהוּא בַּמְּלָכִים יִתְקַלָּס וְרֹזְנִים מִשְׂחָק לוֹ

הוּא לְכָל מִבְצָר יִשְׂחָק וַיִּצְבֹּר עָפָר וַיִּלְכְּדָֿהּ:

{יא} אָז חָלַף רוּחַ וַיַּעֲבֹר וְאָשֵׁם זוּ כֹחוֹ לֵאלֹהוֹ׃

{יב} הֲלוֹא אַתָּה מִקֶּדֶם יְהוָה אֱלֹהַי קְדֹשִׁי לֹא נמוּת

יְהוָה לְמִשְׁפָּט שַׂמְתּֿוֹ וְצוּר לְהוֹכִיחַ יְסַדְתּוֹ׃

{יג} טְהוֹר עֵינַיִם מֵרְאוֹת רָע וְהַבִּיט אֶל עָמָל לֹא תוּכָל

לָמָּה תַבִּיט בּוֹגְדִים תַּחֲרִישׁ בְּבַלַּע רָשָׁע צַדִּיק מִמֶּנּוּ׃

{יד} וַתַּעֲשֶׂה אָדָם כִּדְגֵי הַיָּם כְּרֶמֶשׂ לֹא מֹשֵׁל בּוֹ׃

{טו} כֻּלֹּה בְּחַכָּה הֵעֲלָה יְגֹרֵהוּ בְחֶרְמוֹ

וְיַאַסְפֵהוּ בְּמִכְמַרְתּוֹ עַל כֵּן יִשְׂמַח וְיָגִיל׃

{טז} עַל כֵּן יְזַבֵּֿחַ לְחֶרְמוֹ וִיקַטֵּר לְמִכְמַרְתּוֹ

כִּי בָהֵמָּה שָׁמֵן חֶלְקוֹ וּמַאֲכָלוֹ בְּרִאָֿה׃

{יז} הַעַל כֵּן יָרִיק חֶרְמוֹ וְתָמִיד לַהֲרֹג גּוֹיִם לֹא יַחְמוֹל׃

ב

{א} עַל מִשְׁמַרְתִּי אֶעֱמֹדָה וְאֶתְיַצְּבָה עַל מָצוֹרִי

וַאֲצַפֶּה לִרְאוֹת מַה יְדַֿבֶּר בִּי וּמָה יָשִׁיב עַל תּוֹכַחְתִּי׃

{ב} וַיַּעֲנֵנִי יְהוָה וַיֹּֿאמֶר כְּתֹב חָזוֹן וּבָאֵר עַל הַלֻּחוֹת

לְמַעַן יָרוּץ קוֹרֵא בוֹ:

{ג} כִּי עוֹד חָזוֹן לַמּוֹעֵד וְיָפֵֿחַ לַקֵּץ וְלֹא יְכַזֵּב

אִם יִתְמַהְמָהּ חַכֵּה לוֹ כִּי בֹא יָבֹא לֹא יְאַחֵר׃

{ד} הִנֵּה עֻפְּלָה לֹא יָשְׁרָה נַפְשׁוֹ בּוֹ

וְצַדִּיק בֶּאֱמוּנָתוֹ יִחְיֶה׃

{ה} וְאַף כִּי הוֹן יבגֹד גֶּבֶר יָהִיר וְלֹא יִנְוֶה

אֲשֶׁר הִרְחִיב כִּשְׁאוֹל נַפְשׁוֹ וְהוּא כַמָּוֶת וְלֹא יִשְׂבָּע

וַיֶּאֱסֹף אֵלָיו כָּל הַגּוֹיִם וַיִּקְבֹּץ אֵלָיו כָּל הָעַמִּים׃

{ו} הֲלוֹא אֵלֶּה כֻלָּם עָלָיו מָשָׁל יִשָּֿׂאוּ וּמְלִיצֵי חִידוֹת לוֹ

וְיֹאמַר הוֹי הַמַּרְבֶּה לֹּא לוֹ עַד מָתַי יכבד עָלָיו עַבְטִיט׃

{ז} הֲלוֹא פֶתַע יָקוּמוּ נֹשְׁכֶיךָ וְיָקִצוּ מְזַעְזְעֶיךָ

וְהָיִיתָ לִמְשִׁסּוֹת לָֿמוֹ׃

{ח} כִּי אַתָּה שַׁלּוֹתָ גּוֹיִם רַבִּים יְשָׁלּוּךָ כָּל יֶתֶר עַמִּים

מִדְּמֵי אָדָם וַחֲמַס אֶרֶץ קִרְיָה וְכָל יֹֿשְׁבֵי בָהּ׃

{ט} הוֹי בֹּצֵעַ בֶּצַע רָע לְבֵיתוֹ

לָשׂוּם בַּמָּרוֹם קִנּוֹ לְהִנָּצֵל מִכַּף רָע׃

{י} יָעַצְתָּ בֹּֿשֶׁת לְבֵיתֶֿךָ קְצווֹת עַמִּים רַבִּים וְחוֹטֵא נַפְשֶֿׁךָ׃

{יא} כִּי אֶבֶן מִקִּיר תִּזְעָק וְכָפִיס מֵעֵץ יַעֲנֶנָּה׃

{יב} הוֹי בֹּנֶה עִיר בְּדָמִים וְכוֹנֵן קִרְיָה בְּעַוְלָה׃

{יג} הֲלוֹא הֵנָּה מֵאֵת יְהוָה צְבָאוֹת

וְיִיגְעוּ עַמִּים בְּדֵי אֵשׁ וּלְאֻמִּים בְּדֵי רִיק יִעָֿפוּ׃

{יד} כִּי תִּמָּלֵא הָאָרֶץ לָדַעַת אֶת כְּבוֹד יְהוָה

כַּמַּיִם יְכַסּוּ עַל יָם׃

{טו} הוֹי מַשְׁקֵה רֵעֵהוּ מספל חֲמָתךָ

וְאַף שַׁכֵּֿר לְמַעַן הַבִּיט עַל מְעוֹרֵיהֶם

{טז} שָׂבַעְתָּ קָלוֹן מִכָּבוֹד שְׁתֵה גַם אַתָּה וְהרעל

תִּסּוֹב עָלֶיךָ כּוֹס יְמִין יְהוָה וְקִיקָלוֹן עַל כְּבוֹדֶֿךָ׃

{יז} כִּי חֲמַס לְבָנוֹן יְכַסֶּֿךָּ וְשֹׁד בְּהֵמוֹת יְחתֵךָּ

מִדְּמֵי אָדָם וַחֲמַס אֶרֶץ קִרְיָה וְכָל יֹֿשְׁבֵי בָהּ׃

{יח} מָה הוֹעִיל פֶּסֶל כִּי פְסָלוֹ יֹצְרוֹ מַסֵּכָה וּמֿוֹרֶה שָּׁקֶר

כִּי בָטַח יֹצֵר יִצְרוֹ עָלָיו לַעֲשׂוֹת אֱלִילִים אִלְּמִים׃

{יט} הוֹי אֹמֵר לָעֵץ הָקִיצָה עוּרִי לְאֶבֶן דּוּמָם הוּא יוֹרֶה

הִנֵּה הוּא תָּפוּשׂ זָהָב וָכֶסֶף וְכָל רוּחַ אֵין בְּקִרְבּוֹ׃

{כ} וַיהוָה בְּהֵיכַל קָדְשׁוֹ הַס מִלפָנָיו כָּל הָאָרֶץ׃

ג

{א} תְּפִלָּה לַחֲבַקּוּק הַנָּבִיא עַל שִׁגְיֹנוֹת׃

{ב} יְהוָה שָׁמַעְתִּי שִׁמְעֲךָ יָרֵאתִי יְהוָה פָּעָלְךָ

בְּקֶרֶב שָׁנִים חַיֵּֿיהוּ בְּקֶרֶב שָׁנִים תּוֹדִיעַ

בְּרֹגֶז רַחֵֿם תִּזְכּוֹר׃

{ג} אֱלוֹהַּ מִתֵּימָן יָבוֹא וְקָדוֹשׁ מֵהַר פָּארָן סֶֿלָה

כִּסָּה שָׁמַיִם הוֹדוֹ וּתְהִלָּתוֹ מָלְאָה הָאָרֶץ׃

{ד} וְנֹגַהּ כָּאוֹר תִּהְיֶה קַרְנַיִם מִיָּדוֹ לוֹ וְשָׁם חֶבְיוֹן עֻזֹּה׃

{ה} לְפָנָיו יֵלֶךְ דָּֿבֶר וְיֵצֵא רֶשֶׁף לְרַגְלָיו׃

{ו} עָמַד וַיְמֹדֶד אֶרֶץ רָאָה וַיַּתֵּר גּוֹיִם

וַיִּתְפֹּצְצוּ הַרְרֵי עַד שַׁחֿוּ גִּבְעוֹת עוֹלָם הֲלִיכוֹת עוֹלָם לוֹ׃

{ז} תַּחַת אָוֶן רָאִיתִי אָהֳלֵי כוּשָֿׁן יִרְגְּזוּן יְרִיעוֹת אֶרֶץ מִדְיָן׃

{ח} הֲבִנְהָרִים חָרָה יְהוָה אִם בַּנְּהָרִים אַפֶּֿךָ

אִם בַּיָּם עֶבְרָתֶֿךָ כִּי תִרְכַּב עַל סוּסֶֿיךָ מַרְכְּבֹתֶיךָ יְשׁוּעָה׃

{ט} עֶרְיָה תֵעוֹר קַשְׁתֶּֿךָ שְׁבֻעוֹת מַטּוֹת אֹֿמֶר סֶלָה

נְהָרוֹת תְּבַקַּע אָרֶץ׃

{י} רָאוּךָ יָחִילוּ הָרִים זֶרֶם מַיִם עָבָר

נָתַן תְּהוֹם קוֹלוֹ רוֹם יָדֵיהוּ נָשָׂא׃

{יא} שֶׁמֶשׁ יָרֵחַ עָמַד זְבֻלָה לְאוֹר חִצֶּיךָ יְהַלֵּֿכוּ

לְנֹגַהּ בְּרַק חֲנִיתֶךָ׃

{יב} בְּזַעַם תִּצְעַד אָרֶץ בְּאַף תָּדוּשׁ גּוֹיִם׃

{יג} יָצָאתָ לְיֵשַׁע עַמֶּֿךָ לְיֵשַׁע אֶת מְשִׁיחֶֿךָ

מָחַצְתָּ רֹּאשׁ מִבֵּית רָשָׁע עָרוֹתָ יְסוֹד עַד צַוָּאר סֶֿלָה׃

{יד} נָקַבְתָּ בְמַטָּיו רֹאשׁ פְּרָזוֹ

יִסְעֲרוּ לַהֲפִיצֵנִי עֲלִיצֻתָם כְּמוֹ לֶאֱכֹל עָנִי בַּמִּסְתָּר׃

{טו} דָּרַכְתָּ בַיָּם סוּסֶיךָ חֹמֶר מַיִם רַבִּים׃

{טז} שָׁמַעְתִּי וַתִּרְגַּז בִּטְנִי לְקוֹל צָלְלוּ שְׂפָתַי

יָבוֹא רָקָב בַּעֲצָמַי וְתַחְתַּי אֶרְגָּז

אֲשֶׁר אָנוּחַ לְיוֹם צָרָה לַעֲלוֹת לְעַם יְגוּדֶֿנּוּ׃

{יז} כִּי תְאֵנָה לֹא תִפְרָח וְאֵין יְבוּל בַּגְּפָנִים

כָּחַשׁ מַעֲשֵׂה זַיִת וּשְׁדֵמוֹת לֹא עָֿשָׂה

אֹכֶל נגָּזַר מִמִּכְלָה צֹאן וְאֵין בָּקָר בָּרְפָתִים׃

{יח} וַאֲנִי בַּיהוָה אֶעְלוֹזָה אָגִילָה בֵּאלֹהֵי יִשְׁעִי׃

{יט} יהוָה חֵילִי וַיָּשֶׂם רַגְלַי כָּאַיָּלוֹת

וְעַל בָּמוֹתַי יַדְרִכֵֿנִי לַמְנַצֵּחַ בִּנְגִינוֹתָי׃