חיבור תהלות צו+צח

תהלה צו (א-י)

א שִׁירוּ לַיהוָה שִׁיר חָדָשׁ

שִׁירוּ לַיהוָה כָּל הָאָרֶץ׃

ב שִׁירוּ לַיהוָה בָּרְכוּ שְׁמוֹ

בַּשְּׂרוּ מִיּוֹם לְיוֹם יְשׁוּעָתוֹ׃

ג סַפְּרוּ בַגּוֹיִם כְּבוֹדוֹ

בְּכָל הָעַמִּים נִפְלְאוֹתָיו׃

ד כִּי גָדוֹל יְהוָה וּמְהֻלָּל מְאֹד

נוֹרָא הוּא עַל כָּל אֱלֹהִים׃

ה כִּי כָּל אֱלֹהֵי הָעַמִּים אֱלִילִים

וַיהוָה שָׁמַיִם עָשָׂה׃

ו הוֹד וְהָדָר לְפָנָיו

עֹז וְתִפְאֶרֶת בְּמִקְדָּשׁוֹ׃

ז הָבוּ לַיהוָה מִשְׁפְּחוֹת עַמִּים

הָבוּ לַיהוָה כָּבוֹד וָעֹז׃

ח הָבוּ לַיהוָה כְּבוֹד שְׁמוֹ

שְׂאוּ מִנְחָה וּבֹאוּ לְחַצְרוֹתָיו׃

ט הִשְׁתַּחֲווּ לַיהוָה בְּהַדְרַת קֹדֶשׁ

חִילוּ מִפָּנָיו כָּל הָאָרֶץ׃

י אִמְרוּ בַגּוֹיִם יְהוָה מֶלֶךְ

אַף תִּכּוֹן תֵּבֵל בַּל תִּמּוֹט

יָדִין עַמִּים בְּמֵישָׁרִים׃

תהלה צח

א שִׁירוּ לַיהוָה שִׁיר חָדָשׁ

כִּי נִפְלָאוֹת עָשָׂה

הוֹשִׁיעָה לּוֹ יְמִינוֹ וּזְרוֹעַ קָדְשׁוֹ׃

ב הוֹדִיעַ יְהוָה יְשׁוּעָתוֹ

לְעֵינֵי הַגּוֹיִם גִּלָּה צִדְקָתוֹ׃

ג זָכַר חַסְדּוֹ וֶאֱמוּנָתוֹ לְבֵית יִשְׂרָאֵל

רָאוּ כָל אַפְסֵי אָרֶץ אֵת יְשׁוּעַת אֱלֹהֵינוּ׃

ד הָרִיעוּ לַיהוָה כָּל הָאָרֶץ פִּצְחוּ וְרַנְּנוּ וְזַמֵּרוּ׃

ה זַמְּרוּ לַיהוָה בְּכִנּוֹר בְּכִנּוֹר וְקוֹל זִמְרָה׃

ו בַּחֲצֹצְרוֹת וְקוֹל שׁוֹפָר

הָרִיעוּ לִפְנֵי הַמֶּלֶךְ יְהוָה׃

פסוקי חתימה מתהלה צו ( יא-יג)

יא יִשְׂמְחוּ הַשָּׁמַיִם וְתָגֵל הָאָרֶץ

יִרְעַם הַיָּם וּמְלֹאוֹ׃

יב יַעֲלֹז שָׂדֵה וְכָל אֲשֶׁר בּוֹ

אָז יְרַנְּנוּ כָּל עֲצֵי יָעַר לִפְנֵי יְהוָה:

יג כִּי בָא לִשְׁפֹּט הָאָרֶץ

יִשְׁפֹּט תֵּבֵל בְּצֶדֶק וְעַמִּים בֶּאֱמוּנָתוֹ׃

יחד 22 פסוקים.