אֲהַלְלֶךָּ אֱלֹהֵי יִשְׁעִי אוֹדְךָ אֱלֹהֵי אָבִי.

אֲסַפְּרָה שִׁמְךָ מָעוֹז חַיַּי כִּי פָדִיתָ מִמָּוֶת נַפְשִׁי.

חָשַׂכְתָּ בְשָׂרִי מִשַּׁחַת וּמִיַּד שְׁאוֹל הִצַּלְתָּ רַגְלִי.

פִּצִּיתַנִי מִדִּבַּת עָם מִשּׁוֹט דִּבַּת לָשׁוֹן וּמִשְּׂפַת שָׂטֵי כָזָב.

נֶגֶד קָמַי הָיִיתָה לִּי עֲזַרְתַּנִי כְּרוֹב חַסְדֶּךָ.

מִמּוֹקֵש צוֹפֵי צַלְעִי וּמִּיַד מְבַקְשֵׁי נַפְשִׁי.

מֵרַבּוֹת צָרוֹת הוֹשַׁעְתָּנִי וּמִמְּצוּקוֹת שַׁלְהֶבֶת מִסָּבִיב.

מְכַבּוֹת אֵשׁ לְאֵין פֶּחָה מֵרֶחֶם תְּהוֹם לְאִמִּי.

מִשִׂפְתֵי זִמָּה וְטֹפְלֵי שֶׁקֶר וְחִצֵּי לְשוֹן מִרְמָה.

וַתִּגַּע לַמָּוֶת נַפְשִׁי וְחַיָּתִי לִשְׁאוֹל תַּחְתִּיּוֹת.

וָאֶפְנֶה סָבִיב וְאֵין עוֹזֵר לִי וַאֲצַפֶּה סוֹמֵךְ וְאָיִן.

וָאֶזְכְּרָה אֶת רַחֲמֵי יְהֹוָה וַחֲסָדָיו אֲשֶׁר מֵעוֹלָם.

הַמַּצִּיל אֶת חוֹסֵי בוֹ וַיִּגְאָלֵם מִכָּל רָע.

וְאָרִים מֵאֶרֶץ קוֹלִי וּמִּשַּׁעֲרֵי שְׁאוֹל שִׁוַּעְתִּי.

וַאֲרוֹמֵם יְהֹוָה אָבִי אַתָּה כִּי אַתָּה גִּבּוֹר יִשְׁעִי.

אַל תַּרְפֵּנִי בְּיוֹם צָרָה בּיוֹם שׁוֹאָה וּמְשׁוֹאָה.

אֲהַלְלָה שִׁמְךָ תָּמִיד וְאֶזְכָּרְךָ בִּתְפִלָּה.

אָז שָׁמַע קוֹלִי יְהֹוָה וַיַּאֲזִין אֶל תַּחֲנוּנָי.

וַיִּפְדֵּנִי מִכָּל רָע וַיְמַלְּטֵנִי בְּיוֹם צָרָה.

עַל כֵּן הוֹדֵיתִי וַאֲהַלְלָה וַאֲבָרְכָה אֶת שֵׁם יְהֹוָה.

הוֹדוּ לַיהֹוָה כִּי טוֹב כִּי לְעוֹלָם חַסְדּוֹ.

הוֹדוּ לְאֵל הַתִּשְׁבָּחוֹת כִּי לְעוֹלָם חַסְדּוֹ.

הוֹדוּ לְשׁוֹמֵר יִשְׂרָאֵל כִּי לְעוֹלָם חַסְדּוֹ.

הוֹדוּ לְיוֹצֵר הַכֹּל כִּי לְעוֹלָם חַסְדּוֹ.

הוֹדוּ לְגוֹאֵל יִשְׂרָאֵל כִּי לְעוֹלָם חַסְדּוֹ.

הוֹדוּ לִמְקַבֵּץ נִדְחֵי יִשְׂרָאֵל כִּי לְעוֹלָם חַסְדּוֹ.

הוֹדוּ לְבוֹנֶה עִירוֹ וּמִקְדָּשׁוֹ כִּי לְעוֹלָם חַסְדּוֹ.

הוֹדוּ לַמַּצְמִיחַ קֶרֶן לְבֵית דָּוִד כִּי לְעוֹלָם חַסְדּוֹ.

הוֹדוּ לְבוֹחֵר בִּבְנֵי צָדוֹק לְכֹהֵן כִּי לְעוֹלָם חַסְדּוֹ.

הוֹדוּ לְמָגֵן אַבְרָהָם כִּי לְעוֹלָם חַסְדּוֹ.

הוֹדוּ לְצוּר יִצְחָק כִּי לְעוֹלָם חַסְדּוֹ.

הוֹדוּ לְאַבִּיר יַעֲקֹב כִּי לְעוֹלָם חַסְדּוֹ.

הוֹדוּ לְבוֹחֵר בְּצִיּוֹן כִּי לְעוֹלָם חַסְדּוֹ.

הוֹדוּ לְמֶלֶךְ מַלְכֵי מְלָכִים כִּי לְעוֹלָם חַסְדּוֹ.

וַיָּרֶם קֶרֶן לְעַמּוֹ תְּהִלָּה לְכָל חֲסִידָיו לִבְנֵי יִשְׂרָאֵל עַם קְרוֹבוֹ, הַלְלוּ-יָהּ.