תְּהִלַּת יְהוָה יְדַבֶּר פִּי:
א

אַשְׁרֵי הָאִישׁ אֲשֶׁר לֹא הָלַךְ בַּעֲצַת רְשָׁעִים


וּבְדֶרֶךְ חַטָּאִים לֹא עָמָד 


וּבְמוֹשַׁב לֵצִים לֹא יָשָׁב׃


כִּי אִם בְּתוֹרַת יהוָה חֶפְצוֹ


וּבְתוֹרָתוֹ יֶהְגֶּה יוֹמָם וָלָיְלָה׃


וְהָיָה כְּעֵץ שָׁתוּל עַל פַּלְגֵי מָיִם


אֲשֶׁר פִּרְיוֹ יִתֵּן בְּעִתּוֹ וְעָלֵהוּ לֹא יִבּוֹל


וְכֹל אֲשֶׁר יַעֲשֶׂה יַצְלִיחַ׃


לֹא כֵן הָרְשָׁעִים 


כִּי אִם כַּמֹּץ אֲשֶׁר תִּדְּפֶנּוּ רוּחַ׃


עַל כֵּן לֹא יָקֻמוּ רְשָׁעִים בַּמִּשְׁפָּט


 וְחַטָּאִים בַּעֲדַת צַדִּיקִים׃


כִּי יוֹדֵעַ יְהוָה דֶּרֶךְ צַדִּיקִים


וְדֶרֶךְ רְשָׁעִים תֹּאבֵד׃