תְּהִלַּת יְהוָה יְדַבֶּר פִּי:
סא
לַמְנַצֵּחַ עַל נְגִינַת לְדָוִד

שִׁמְעָה יְהוָה רִנָּתִי     


הַקְשִׁיבָה תְּפִלָּתִי׃

מִקְצֵה הָאָרֶץ אֵלֶיךָ אֶקְרָא    


בַּעֲטֹף לִבִּי  בְּצוּר יָרוּם מִמֶּנִּי תַנְחֵנִי׃

כִּי הָיִיתָ מַחְסֶה לִי    


מִגְדַּל עֹז מִפְּנֵי אוֹיֵב׃

אָגוּרָה בְאָהָלְךָ עוֹלָמִים     


אֶחֱסֶה בְסֵתֶר כְּנָפֶיךָ סֶּלָה׃

כִּי אַתָּה יְהוָה שָׁמַעְתָּ לִנְדָרָי     


נָתַתָּ יְרֻשַּׁת יִרְאֵי שְׁמֶךָ׃

יָמִים עַל יְמֵי מֶלֶךְ תּוֹסִיף     


שְׁנוֹתָיו כְּמוֹ דֹר וָדֹר׃

 יֵשֵׁב עוֹלָם לִפְנֵי יְהוָה    


חֶסֶד וֶאֱמֶת מַן יִנְצְרֻהוּ׃

 כֵּן אֲזַמְּרָה שִׁמְךָ לָעַד     


לְשַׁלְּמִי נְדָרַי יוֹם יוֹם׃