תְּהִלַּת יְהוָה יְדַבֶּר פִּי:
לד
לְדָוִד בְּשַׁנּוֹתוֹ אֶת טַעְמוֹ לִפְנֵי אֲבִימֶלֶךְ וַיְגָרֲשֵׁהוּ וַיֵּלַךְ

אֲבָרְכָה אֶת יְהוָה בְּכָל עֵת    


תָּמִיד תְּהִלָּתוֹ בְּפִי׃


בַּיהוָה תִּתְהַלֵּל נַפְשִׁי   


יִשְׁמְעוּ עֲנָוִים וְיִשְׂמָחוּ׃


גַּדְּלוּ לַיהוָה אִתִּי    


וּנְרוֹמְמָה שְׁמוֹ יַחְדָּו׃


דָּרַשְׁתִּי אֶת יְהוָה וְעָנָנִי    


וּמִכָּל מְגוּרוֹתַי הִצִּילָנִי׃


הִבִּיטוּ אֵלָיו וְנָהָרוּ    


וּפְנֵיהֶם אַל יֶחְפָּרוּ׃ 


זֶה עָנִי קָרָא וַיהוָה שָׁמֵעַ    


וּמִכָּל צָרוֹתָיו הוֹשִׁיעוֹ׃


חֹנֶה מַלְאַךְ יְהוָה סָבִיב לִירֵאָיו וַיְחַלְּצֵם׃


טַעֲמוּ וּרְאוּ כִּי טוֹב יְהוה    


אַשְׁרֵי הַגֶּבֶר יֶחֱסֶה בּוֹ׃


יְראוּ אֶת יְהוָה קְדֹשָׁיו     


כִּי אֵין מַחְסוֹר לִירֵאָיו׃


כְּפִירִים רָשׁוּ וְרָעֵבוּ     


וְדֹרְשֵׁי יְהוָה לֹא יַחְסְרוּ כָל טוֹב׃


לְכוּ בָנִים שִׁמְעוּ לִי    


יִרְאַת יְהוָה אֲלַמֶּדְכֶם׃


מִי הָאִישׁ הֶחָפֵץ חַיִּים     


אֹהֵב יָמִים לִרְאוֹת טוֹב׃


נְצֹר לְשׁוֹנְךָ מֵרָע     


וּשְׂפָתֶיךָ מִדַּבֵּר מִרְמָה׃


סוּר מֵרָע וַעֲשֵׂה טוֹב     


בַּקֵּשׁ שָׁלוֹם וְרָדְפֵהוּ׃


עֵינֵי יְהוָה אֶל צַדִּיקִים     


וְאָזְנָיו אֶל שַׁוְעָתָם׃


פֹּדֶה יְהוָה נֶפֶשׁ עֲבָדָיו    


וְלֹא יֶאְשְׁמוּ כָּל הַחֹסִים בּוֹ׃


צָעֲקוּ וַיהוָה שָׁמֵעַ     


וּמִכָּל צָרוֹתָם הִצִּילָם׃


קָרוֹב יְהוָה לְנִשְׁבְּרֵי לֵב     


וְאֶת דַּכְּאֵי רוּחַ יוֹשִׁיעַ׃


רַבּוֹת רָעוֹת צַדִּיק     


וּמִכֻּלָּם יַצִּילֶנּוּ יְהוָה׃


שֹׁמֵר כָּל עַצְמוֹתָיו     


אַחַת מֵהֵנָּה לֹא נִשְׁבָּרָה׃


תְּמוֹתֵת רָשָׁע רָעָה     


וְשֹׂנְאֵי צַדִּיק יֶאְשָׁמוּ׃


פְּנֵי יְהוָה בְּעֹשֵׂי רָע    


לְהַכְרִית מֵאֶרֶץ זִכְרָם׃