תְּהִלַּת יְהוָה יְדַבֶּר פִּי:
צט

יְהוָה מָלָךְ יִרְגְּזוּ עַמִּים 


יֹשֵׁב כְּרוּבִים תָּנוּט הָאָרֶץ׃


יְהוָה בְּצִיּוֹן גָּדוֹל וְרָם הוּא עַל כָּל הָעַמִּים׃


יוֹדוּ שִׁמְךָ גָּדוֹל וְנוֹרָא  קָדוֹשׁ הוּא׃


וְעֹז מֶלֶךְ מִשְׁפָּט אָהֵב אַתָּה כּוֹנַנְתָּ מֵישָׁרִים 


מִשְׁפָּט וּצְדָקָה בְּיַעֲקֹב אַתָּה עָשִׂיתָ׃


רוֹמְמוּ יְהוָה אֱלֹהֵינוּ וְהִשְׁתַּחֲווּ לַהֲדֹם רַגְלָיו  


קָדוֹשׁ הוּא׃


מֹשֶׁה וְאַהֲרֹן בְּכֹהֲנָיו וּשְׁמוּאֵל בְּקֹרְאֵי שְׁמוֹ 


קֹראים אֶל יְהוָה וְהוּא יַעֲנֵם׃


בְּעַמּוּד עָנָן יְדַבֵּר אֲלֵיהֶם 


שָׁמְרוּ עֵדֹתָיו וְחֹק נָתַן לָמוֹ׃


יְהוָה אֱלֹהֵינוּ אַתָּה עֲנִיתָם 


אֵל נֹשֵׂא הָיִיתָ לָהֶם וְנֹקֵם עַל עֲלִילוֹתָם׃


רוֹמְמוּ יְהוָה אֱלֹהֵינוּ וְהִשְׁתַּחֲווּ לְהַר קָדְשׁוֹ 


כִּי קָדוֹשׁ יְהוָה אֱלֹהֵינוּ׃