אַשְׁרֵי נְשׂוּי פֶּשַׁע כְּסוּי חֲטָאָה׃
אַשְׁרֵי אָדָם לֹא יַחְשֹׁב יְהוָה לוֹ עָוֹן    
וְאֵין בְּרוּחוֹ רְמִיָּה׃
כִּי הֶחֱרַשְׁתִּי בָּלוּ עֲצָמָי בְּשַׁאֲגָתִי כָּל הַיּוֹם׃
כִּי יוֹמָם וָלַיְלָה תִּכְבַּד עָלַי יָדֶךָ     
נֶהְפַּךְ לִשְׁדִּי כְּחָרְבְּנֵי קַיִץ סֶלָה׃
חַטָּאתִי אוֹדִיעֲךָ  וַעֲוֹנִי לֹא כִסִּיתִי 
אָמַרְתִּי אוֹדֶה עֲלֵי פְשָׁעַי לַיהוָה    
וְאַתָּה נָשָׂאתָ עֲון חַטָּאתִי סֶלָה׃ 
עַל זֹאת יִתְפַּלֵּל כָּל חָסִיד אֵלֶיךָ לְעֵת מְצֹא
רַק לְשֵׁטֶף מַיִם רַבִּים אֵלָיו לֹא יַגִּיעוּ׃
אַתָּה סֵתֶר לִי מִצַּר תִּצְּרֵנִי   
פַלֵּט תְּסוֹבְבֵנִי סֶלָה׃ 
אַשְׂכִּילְךָ וְאוֹרְךָ בְּדֶרֶךְ זוּ תֵלֵךְ 
אִיעֲצָה עָלֶיךָ עֵינִי׃
אַל תִּהְיוּ כְּסוּס כְּפֶרֶד אֵין הָבִין
בְּמֶתֶג וָרֶסֶן עֶדְיוֹ לִבְלוֹם בַּל קְרֹב אֵלֶיךָ׃
רַבִּים מַכְאוֹבִים לָרָשָׁע     
וְהַבּוֹטֵחַ בְּיהוָה חֶסֶד יְסוֹבְבֶנּוּ׃