תְּהִלַּת יְהוָה יְדַבֶּר פִּי:
מט
לַמְנַצֵּחַ לִבְנֵי קֹרַח מִזְמוֹר

שִׁמְעוּ זֹאת כָּל הָעַמִּים    


הַאֲזִינוּ כָּל יֹשְׁבֵי חָלֶד׃


גַּם בְּנֵי אָדָם גַּם בְּנֵי אִישׁ     


יַחַד עָשִׁיר וְאֶבְיוֹן׃


פִּי יְדַבֵּר חָכְמוֹת     


וְהָגוּת לִבִּי תְבוּנוֹת׃


אַטֶּה לְמָשָׁל אָזְנִי     


אֶפְתַּח בְּכִנּוֹר חִידָתִי׃


לָמָּה אִירָא בִּימֵי רָע     


עֲון עֲקֵבַי יְסוּבֵּנִי׃


הַבֹּטְחִים עַל חֵילָם     


וּבְרֹב עָשְׁרָם יִתְהַלָּלוּ׃


אָח לֹא פָדֹה יִפְדֶּה אִישׁ      


לֹא יִתֵּן לֵאלֹהִים כָּפְרוֹ׃


וְיֵקַר פִּדְיוֹן נַפְשָׁם וְחָדַל לְעוֹלָם׃


וִיחִי עוֹד לָנֶצַח לֹא יִרְאֶה הַשָּׁחַת׃


כִּי יִרְאֶה חֲכָמִים יָמוּתוּ יַחַד   


כְּסִיל וָבַעַר יֹאבֵדוּ וְעָזְבוּ לַאֲחֵרִים חֵילָם׃


קִבְרם בָּתֵּימוֹ לְעוֹלָם 


מִשְׁכְּנֹתָם לְדוֹר וָדֹר   


קָרְאוּ בִשְׁמוֹתָם עֲלֵי אֲדָמוֹת׃


וְאָדָם בִּיקָר בַּל יָלִין    


נִמְשַׁל כַּבְּהֵמוֹת נִדְמוּ׃


זֶה דַרְכָּם כֵּסֶל לָמוֹ    


וְאַחֲרֵיהֶם בְּפִיהֶם יֵרָצוּ סֶלָה׃


 כַּצֹּאן לְשְׁאוֹל שַֿׁתּוּ מָוֶת יִרְעֵם 


וַיִּרְדּוּ בָם יְשָׁרִים לַבֹּקֶר


וצירם לְבַלּוֹת שְׁאוֹל מִזְּבֻל לוֹ׃


אַךְ יְהוָה יִפְדֶּה נַפְשִׁי מִיַּד שְׁאוֹל    


כִּי יִקָּחֵנִי סֶלָה׃


אַל תִּירָא כִּי יַעֲשִׁר אִישׁ     


כִּי יִרְבֶּה כְּבוֹד בֵּיתוֹ׃


כִּי לֹא בְמוֹתוֹ יִקַּח הַכֹּל    


לֹא יֵרֵד אַחֲרָיו כְּבוֹדוֹ׃


כִּי נַפְשׁוֹ בְּחַיָּיו יְבָרֵךְ 


וְיוֹדְךָ כִּי תֵיטִיב לָךְ׃


תָּבוֹא עַד דּוֹר אֲבוֹתָיו    


עַד נֵצַח לֹא יִרְאוּ אוֹר׃


אָדָם בִּיקָר וְלֹא יָבִין     


נִמְשַׁל כַּבְּהֵמוֹת נִדְמוּ׃