א  רֹעֵה יִשְׂרָאֵל הַֽאֲזִינָה   נֹהֵג כַּצֹּאן יוֹסֵף
ב  יֹשֵׁב הַכְּרוּבִים הוֹפִיעָה  לִפְנֵי אֶפְרַיִם וּבִנְיָמִן וּמְנַשֶּׁה
ג  עוֹרְרָה אֶת גְּבוּרָתֶךָ   וּלְכָה לִישֻׁעָתָה לָּנוּ׃
ד  יְהֹוָה הֲשִׁיבֵנוּ     וְהָאֵר פָּנֶיךָ וְנִוָּשֵׁעָה׃
ה  יְהוָה צְבָאוֹת    עַד מָתַי עָשַׁנְתָּ בִּתְפִלַּת עַמֶּךָ׃
ו  הֶֽאֱכַלְתָּם לֶחֶם דִּמְעָה   וַתַּשְׁקֵמוֹ בִּדְמָעוֹת שָׁלִישׁ׃
ז  תְּשִׂימֵנוּ מָדוֹן לִשְׁכֵנֵינוּ   וְאֹיְבֵינוּ יִלְעֲגוּ לָמוֹ׃
ח  יְהֹוָה צְבָאוֹת הֲשִׁיבֵנוּ   וְהָאֵר פָּנֶ֗יךָ וְנִוָּשֵׁעָה׃
ט  גֶּפֶן מִמִּצְרַיִם תַּסִּיעַ     תְּגָרֵשׁ גּוֹיִם וַתִּטָּעֶהָ׃
י   פִּנִּיתָ לְפָנֶיהָ   וַתַּשְׁרֵשׁ שָׁרָשֶׁיהָ וַתְּמַלֵּא אָֽרֶץ׃
יא  כִּסּוּ הָרִים צִלָּהּ    וַעֲנָפֶיהָ אַרְזֵי אֵל׃
יב  תְּשַׁלַּח קְצִירֶהָ עַד יָם   וְאֶל נָהָר יוֹנְקוֹתֶיהָ׃
יג  לָמָּה פָּרַצְתָּ גְדֵרֶיהָ     וְאָרוּהָ כָּל עֹבְרֵי דָרֶךְ׃
יד  יְכַרְסְמֶנָּה חֲזִיר מִיָּעַר     וְזִיז שָׂדַי יִרְעֶנָּה׃
טו  יְהֹוָה צְבָאוֹת  שׁוּב נָא הַבֵּט מִשָּׁמַיִם
טז  וּרְאֵה וּפְקֹד גֶּפֶן זֹאת וְכַנָּה אֲשֶׁר נָֽטְעָה יְמִינֶךָ׃
יז  שְׂרֻפָה בָאֵשׁ כְּסוּחָה     מִגַּעֲרַת פָּנֶיךָ יֹאבֵדוּ׃
יח  תְּהִי יָדְךָ עַל אִישׁ יְמִינֶךָ    עַל בֶּן אָדָם אִמַּצְתָּ לָּךְ׃
יט  וְלֹא נָסוֹג מִמֶּךָּ   תְּחַיֵּנוּ וּבְשִׁמְךָ נִקְרָא׃
כ יְ הוָה צְבָאוֹת הֲשִׁיבֵנוּ     הָאֵר פָּנֶיךָ וְנִוָּשֵׁעָה׃